束草5星級B&B
我同好友丫露都係慢活之人（天生Hae 底），自由行唔想趕頭趕命，所以決定在束草住一晚。於是，束草的住宿就由丫露安排。我地最初打算book Airbnb apartment，不過發現仲available的民宿唔係太貴就係比較殘舊，我地都係住一晚，諗住搵間平平地，但最緊要乾淨企理的房就得。
真係幾好彩，丫露搵到呢間 속초엔 게스트하우스 Sokcho& Guesthouse。我係第一次住旅館，因為皮膚易敏感，少少污漕全身都會又痕又紅，所以對旅館避之則吉。但呢間 Guesthouse 睇相已覺得唔錯，設計簡約但幾modern，就奉獻左人生第一次。點知去到真係好掂，you get what you see!
都話 Hae 底，下午4點先係首爾出發，去到束草已經6點幾，天都黑了！途中，竟然收到 Guesthouse 員工send來的email，話擔心我地迷路，仲手繪了一張地圖教我地去。其實都幾易搵，一出巴士總站後（對面係油站）向右行，一條直路行至迴旋處轉右，再直行約5分鐘便到。
原來Guesthouse在一座大樓的2樓，搭電梯上2樓，就係Reception。不過，外牆招牌又唔顯眼，所以容易行過籠。大廈比較殘舊，我地心諗，唔通中伏？！
點知一出電梯，嘩，正呀！好新淨企理喎，Guesthouse設計簡約又cozy，仲要播埋輕音樂，一入去已經好舒服。
幾幅牆都貼滿遊客寄回來的明信片和照片，feel到好濃厚的人情味。
當時已經7點幾，common room 冇人，我去reception check in，未開口，果個中年男人已經笑住話：「我知你係邊個！呢度係鎖匙，果間係你間房。」
一條走廊大約有6、7間房，我地住第二間。
打開房門，嘩，好大間喎！我地有1張雙人床、一張單人床，仲有好多吉位。木地板一塵不染，床鋪貼貼服服，窗可以打開，怕焗的我開了少少窗讓空氣流通（冬天沒有冷氣，開暖氣較焗）。房間有獨立洗手間，但淋浴和座廁共用沒有分隔，幸好空間頗大，不會整濕座廁。我地對睡房質素都好滿意。
夜晚我地要飲暖水和吃早餐，都係出到common room自己搞掂。早餐有無限雞蛋、麵包、牛油、果醬、咖啡、奶茶等提供，簡簡單單。有少少潔癖的我，煮前先檢查了餐具一遍，真係洗得好乾淨，就放心食用了。住BnB要有個習慣，就係自己食物自己煮，自己碗碟自己洗。吃早餐時遇見幾個男生，佢地用餐後自己洗碗碟。我心諗：「如果客人求奇洗，咁下一個客人咪會用污漕餐具？」後來，我發現原來老闆娘會等男生洗碗後，自己重新將杯碗碟都再洗一次。難怪廚房咁整潔！
呢間Guesthouse其實由一對南韓夫婦開的，老闆娘普通話、英文都好流利，佢好nice咁同我地傾計。
「我地原先住在首爾，我先生在LG 工作多年，不過因為壓力太大，有一年瘦了幾十磅，於是就辭職了，之後我地黎到束草開左呢間小旅館。」老闆娘話，因為佢曾經在台灣留學，所以能說普通話。
「近年南韓經濟很好，物價就一年比一年貴，束草的物價也跟隨首爾升了不少，做生意壓力也大了。加上最近因中韓關係轉差（樂天集團因為供地給駐韓美軍建「薩德」反導系統而得罪中方，中方因而下了「禁韓令」）內地的客人告訴我無法出國，要取消旅程。」我相信這天客人，就只有我們和這班南韓男生入住。老闆娘好健談，將自己的故事、首爾的經濟、教育等民生情況，都同我地一一分享。旅行就是這回事，跟當地人交流互動，才會知道、感受到當地最真實的面貌。今次選這間Guesthouse真的選對了。
離開前，我地都學其他住客咁，同老闆娘影張「即影即有」留念。